რუსეთის იმპერიის მონეტა, რომელიც მოჭრილია 1890 წელს "სურამის " (წიფის) გვირაბის მშენებლობის დასრულების აღსანიშნავად.

გვირაბის მშენებლობა დაიწყო 1886 წელს და დასრულდა 1890 წელს. მშენებლობას ხელმძღვანელობდა პოლონელი ინჟინერი ფერდინანდ რიძევსკი.

გვირაბის საზეიმო გახსნაზე იმყოფებოდა რუსეთის იმპერატორი ალექსანდრე III, რომელსაც ახლდნენ მაღალჩინოსნები პეტერბურგიდან და თბილისიდან. 
იმპერატორის ჩამოსვლასთან დაკავშირებით გვირაბთან ახლოს, ხარაგაულის მუნიციპალიტეტის სოფელ წიფის ტერიტორიაზე დაიდგა ობელისკი, რომელიც დღესაც არსებობს.

"მედლის შუბლზე (წინა ხედზე) გამოსახულია სურამის გვირაბის პორტალი, მისგან გამომავალი ორთქმავლით. ზემოთ მეფე ალექსანდრე მესამის პროფილია, მარჯვნივ და მარცხნივ ქართველი ქალებია ვიოლინოთი ხელში. გარშემო წარწერაა: "სურამის გვირაბის გახსნის აღსანიშნავად, რომელიც დაიწყო 1886 წელს და დამთავრდა 1890 წელს.

მედლის მეორე მხარეს სწერია: "სამუშაოები შესრულებულია გზათა მიმოსვლის სამინისტროს მიერ. სამუშაოთა უფროსი რიძევსკი. გამოკვეთილია აგრეთვე მთელი პირველი დაწყებითი უბნის გზის პროფილი და სადგურები. პუნქტირით ნაჩვენებია ადრე არსებული უღელტეხილის უბანი, რომელიც სურამის ქედზე გადადიოდა. შავი ხაზით მოსჩანს დადაბლებული რკინიგზის ხაზიც".

ამ თავგანწირვის, ამ შემართების
დასტურად, ანდა სულის ვარდებად,
მოჭრეს მედალი როგორც სინათლე
და გამარჯვების აჩირაღდნება.

მოჭრეს მედალი ვით მზის ნატეხი,
ანდა მთის ფიქრი და ცის სამშვენი,
მოჭრეს მედალი დამშვენებული
ყველა მშრომელის გამრჯე მარჯვენით.

ეს იყო იმ დროს დიდების შუქი
და გამარჯვება მართლაც დიადი,
არის მედალი, ანდა სინათლე,
დამარცხებული ანდა წყვდიადი.



აქვე იხილე სტატია  წიფის ობელისკის შესახებ:




ავტორი - გივი კურტანიძე