მოგეხსენებათ, გალაკტიონ ტაბიძე 1910-11 წლებში შორაპნის მაზრის სოფელ ფარცხნალის დაწყებით სკოლაში მუშაობდა პედაგოგად. ცხადია დიდ პოეტზე მრავალი ისტორიაა შემორჩენილი, მათგან ერთ-ერთია ამბავი ცაცხვის ხის შესახებ.
ამონარიდი იზა ვეფხვაძის წიგნიდან “ხარაგაული”
“ერთ დილით, სკოლის ეზოში შესულ გალაკტიონს არასასიამოვნო სურათი დახვედრია: წინა ღამით ძლიერ ქარს ეკლესიის ეზოში დარგული ხუთწლიანი ცაცხვის ნარგავი მოუთხრია. გალაკტიონს მიწის ფხოჭნა დაუწყია. ამ დროს ეზოში მისი მოწაფე ერმალოზ ბუაჩიძე შემოსულა - არიქა, ერთი სარი მიშოვე სადმეო, - უთხოვია გალაკტიონს, ცაცხვის ხისთვის მიწა მიუყრია, შემდგომ ჭიგო დაუსვია და ზედ მიუკრავს, ამის შემდეგ, განსაკუთრებით პატრონობდა ცაცხვის ახალგაზრდა ნერგს, წყალს უსხამდა, ელოლიავებოდა. სოფელში ამ ცაცხვის ხეს დღესაც გალაკტიონის ცაცხვს ეძახიან და რატომღაც ეს ხე სხვა ხეთა შორის გამორჩეული და მკერდგანიერია. საოცარიც არაა, ის ხომ გალაკტიონის ხელშენახებია, მისი სიამაყე და სიდიადე სწორედაც რომ უნდა რცილავდეს სხვა ხეებს.” ტექსტში ნახსენებია სკოლის ეზო, საქმე იმაშია, რომ მაშინ ფარცხნალის დაწყებითი სკოლა ეკლესიის ეზოში მდებარეობდა პატარა ხის შენობაში. დღეისათვის, თუ გალაკტიონის ცაცხვს მოიკითხავთ, ადგილობრივები ფარცხნალის წმინდა კვირიკე და ივლიტას სახელობის ეკლესიის ეზოში მდგომ მრავალწლოვან ცაცხვის ხეზე მიგითითებენ, რომელსაც სამახსოვრო წარწერაც ამშვენებს: "გალაკტიონის ცაცხვი"
ტექსტი მოამზადა გივი კურტანიძემ. 23.01.2017 წ.
|